‘A VERA FACCIA

Nun ‘mporta si è Carmela o si è Teresa,
se fa justo nu nomme a ll’occorrenza,
pe’ qquacche ssantarella casa e cchiesa,
ca se fà judecà’ pe’ ll’apparenza.

Pe’ cchesta specie ‘e femmena v’’o ggiuro,
ca p’’o palato mio nun nce sta gusto;
è ssempe pronta a ffà’ quacche ccensura,
lengua tagliente nun m’’a conta justo.

Sentenno ‘e parlà’’e sesso se sturzella,
e ffà:”P’ammore ‘e Dio,che sso’’sti ccose”.
Vurrìa sapé’ si po’ sott’’a vunnella,
è ttutto ‘ncienzo o addore d’acqua ‘e rose.

Libborio ch’è nu preveto spugliato,
ha rutto ‘o gghiaccio e nun s’è stato zitto;
primma ‘e parlà’ s’ha fatto ‘na resata
e mmo ve conto chello ca m’ha ditto.

“A vera faccia nuje ll’annascunnimme,
e cchello ca sustengo è vverità;
‘a notte dice chello ca nuje simme,
‘e juorne nce vestimmo ‘e santità”.

Una ‘e ‘sti ssantarelle,’na matina,
dice:”Libbò’ lieveme ‘stu peccato,
me so’ scetata e mmo sto ‘ncopp’’e spine,
ma vì’ che ssuonno ca m’haggiu sunnato”.

“facevo ammore cu’ nu scunusciuto,
che maschio don Libbò’, nu terramoto;
talmente ca ‘sta cosa m’è piaciuta,
vulevo piglià’ suonno n’ata vòta”.