MANE STESE
Una poesia sulle tragedie del mare, dove per vivere si scappa dal proprio paese per finire in pasto ai pesci.
‘Na bambulella ‘e plastica liggèra
galleggia ‘ncopp’’a ll’onne e vvène a rriva;
è cchello ca rimmane, chello ch’era
‘e ‘na speranza ca nun è cchiù vviva.
Sciuliata ‘a dint’’e mmane ‘e ‘na criatura
caduta ‘nfunno ‘nzieme a ttanta ggente;
‘a coppa ‘o mare è cchiaro e ssotto è scuro,
addò ‘a miseria dorme eternamente.
Spontano ‘a mare mille mane stese,
ferite aperte ca nisciuno stagna;
nu tuorto fatto a Dio, ‘na grand’offesa…
Doppo ca strilla ‘o tuono, ‘o cielo chiagne!
E ‘nfonne ‘a bbambulella ‘ncopp’’a rena,
ca ha perzo ll’unica perzona cara;
mo nun se move cchù, fa tanta pena,
ll’anema soja se l’ha pigliata ‘o mare.
