‘E TTASSE D’’O PUVERIELLO

A ffin’’e mese,spisso e volentieri
‘nce sta sempe quaccuno ca se lagna.
“Ve vurria dì:Faciteme ‘o piacere...
...Si vuje ve lamentate,io soffro e cchiagno”.

“Vurria pavà pur’io ‘sti ttasse voste...
V’’o ddice don Vicienzo ‘o sapunaro.
Vurria tenè’ pur’io nu bbellu posto,
‘na bbella casa,’na villetta a mare”.

“Pe’ casa tengo nu tre metre ‘e vascio,
pe’ lluce tengo a stiento nu lumino,
pe’ lietto tengo ‘na fetente ‘e cascia
e quatte sacchi spuorche pe’ cuscine”.

“Io songo ‘o rre d’’a famme e d’’a miseria,
me chiammano Vicienzo pelle e ossa;
so’ ssicco sicco e ccu ‘sta faccia seria
pare nu muorto asciuto ‘a dint’’a fossa”.

“Quaccuno dice ca so’ ffurtunato
pecché nun pavo tasse. E’ ‘na buscìa!
‘Sti llacreme ca verzo ‘a che sso’ nnato,
so’’e contribbut’’e tutt’’a vita mia”.