PUR’ IO TENGO NU SUONNO
Anche io ho un sogno e nella mia visione vedo un mondo senza bandiere né confini. Leggete amici e sognate con me.
E mmenu malo ca nce stann’’e suonne
e cchi tène ‘o curaggio ‘e ne parlà’;
chi mmece se sta zitto e ll’annasconne,
affoca ogne ssussulto ‘e libbertà.
Nu suonno a pprimm’ acchitto è n’ utopia
po’ piglia forma e nnasce nu suspiro;
ma chilli llà accusate ‘e pazzarìa,
so’ state squarce ‘e luce dint’’o nniro.
Nu suonno quanno cresce è ‘na ventata
ca scioscia forte e vvotta ‘nterra ‘e mmure;(1)
“j have a dream” è ‘o suonno ‘e chi ha spezzato
tutt’’e ccatene ‘a cuollo ‘a pella scura.
Pur’ io tengo nu suonno, sissignore,
n’ haggia parlà’, nun pò mmurì’ cu’ mmeco;
è nu suspiro carreco d’ ammore
quann’ int’’a capa mia ‘stu munno veco…
Veco nu munno senza cchiù bbannère,
senza cchiù llimmete, senza cunfine;
veco ‘e triunfà’ ll’ eterna primmavèra,
comme si stesse dint’ a nu ciardino.
Ciardino d’’e ddelizie e dd’’o piacere,
si ll’ omme nun se spoglia nun ‘o trova;
‘stu munno è n’ utopìa, ma chi nce crere,
s’hadda fa’ forte ‘e ‘sta cuscienza nova.
1) Muro di Berlino
