‘O BBENE ‘E LL’ UOCCHIE

“Lucì’, ma nun ‘e ssiente ‘sti lamiente?”
Dice San Pietro appena vére ‘a Santa
“Pe’ cchi sta dint’’o scuro è nu turmiento,
mannace ‘o ppoco ‘e luce a ttutte quante”

“’O bbene ‘e ll’uocchie è cchello ch’è cchiù ccaro,
e ttu nun puo’ nnià’’sti ddoje lucelle
a cchi nun sape quant’è ggruosso ‘o mare,
a cchi nun ha maje visto sole e stelle.”

“Dint’ a ‘na chiesia abbascio ‘o Pallunetto,
‘na mamma addulurata ca te ‘mplòra
p’’o criaturiello cieco ca nascette
e sso’ qquatt’anne ca nun vére ancora.”

‘A Santa lacreméa pe’ nu mumento,
e ccomme a cchi accarezza, move ‘a mano.
“Miraculo!miraculo! Fa ‘a ggente
e ssaglie ncielo nu suono ‘e campane.

“Chesti ccampane ca sonano a ffesta
p’’a luce ch’ aggiu dato a ‘stu criaturo,
è ppoca cosa oì Pie’ pe’ cchi po’ resta
cchiù ccieca ‘e chi nun vére pe’ nnatura.”

“’Na vita senza luce è mmorte eterna,
nun nce ‘a putimme dà’ né io e né tu,
pe’ ddà’ chiarore ‘e ttenebre ‘e ‘st’ inferno,
San Pietro mio, nce vò’ sulo Gesù.”