Un tenero ricordo della mia nonna materna.
|
E sso’ vint’anne già ca se n’ è gghiuta,
‘a nonna mia ch’ era nu piezz’’e storia;
‘a tengo arravugliata ‘int’’o vvelluto,
‘nfra tutt’’e ccose care d’’a memmoria.
E qquanno ‘a ‘int’’o vvelluto ‘a tiro fòra,
jesce sempe cchiù ddoce ‘a vicchiarella;
‘a tengo annanze a ll’ uocchie…’A veco ancora,
cu’ nu cartoccio chin’’e caramelle.
Doje p’ Amaliuccia e ddoje pe’ Salvatore,
doje p’ Annuccella e ll’ ati ddoje a Peppino;
tirava ‘a ‘int’’o cartoccio tant’ ammore,
quanno diceva: “ Doje so’ pe’ ‘Ndonino”.
Po’ nce cuntava ‘e chilli tiempe antiche,
d’’a primma uerra e dd’’a freva spagnola;
d’’a cennere e dd’’o llutto ‘e dint’’e viche,
d’’e ccose ca nun nce diceva ‘a scola.
Io so’ sicuro ca mo a ll’ angiulille,
‘a nonna sparte tanta caramelle;
poì aumme…aumme…Dint’ a n’ angulillo,
n’ astipe doje dint’ a ‘na cartuscella.
E ssi pe’ ccaso, ‘a sotto-sotto ‘e scelle,
s’ allonga nu vraccillo malandrino;
‘a nonna fa ttò-ttò ‘ncopp’’e mmanelle,
e dice: “ Chesti ccà so’ pe’ ‘Ndonino!”
|
This text will be replaced
|
