FERMATEVE…

Primm’’e trasì ‘int’’a chiesa ogne matina,
passate nu mumento p’’e spitale;
‘a sufferenza ‘e ll’ate è nu vaccino,
ca ve pulezza ll’anema d’’o mmalo.

Fermateve nu poco ‘int’’e ccurzìe,
addò ve passa annanze ‘na bbarrella,
cu n’omme ca già dice:”Così sia”,
pecché nun sape si nce lascia ‘a pella.

Fermateve ‘nnanze a nu criaturiello,
cu ’a capuzzella senza nu capillo,
ca soffre e cchiagne dint’’a stanzulella,
sul’isso, senza manco n’angiulillo.

Chello ca ve po’ ddà’ nu sofferente,
è ‘o chianto eterno ‘e nu dulore antico;
fermateve gnorsì, pe’ nu mumento,
e ppo’ putite pure avutà ‘o vico!